Seguro que tiñades ganas de volver facer un roteiro en bicicleta de montaña e xa non teredes que esperar moito! O domingo 22 de maio, realizaremos o roteiro do río Tea, con saída desde Salvaterra de Miño.
Serán 35 quilómetros en total por un percorrido sinxelo e moi fermoso, xa que pasaremos por unha das sendas fluviais máis longas e bonitas de Galicia, na que poderemos gozar de carreiros de pescadores, pozas e pesqueiras de lamprea. Ademais, hai moita zona de sombra, pero se a alguén se lle fai moi duro o traxecto, pode reducilo e esperar nalgunha das praias fluviais polas que pasaremos.
A saída está prevista ás 10:30 desde Salvaterra (parque da Canuda) e partirán en sentido ascendente polo río Tea (17 quilómetros) ata chegar á Praia Fluvial dá Freixa en Ponteareas (hora prevista de chegada: 12:00 horas).
Na Freixa teremos o noso momento para descansar, coller forzas e comer e beber algo, antes de tomar o camiño de volta cara a Salvaterra (hora estimada de chegada: 13:30 horas).
Como sempre vos dicimos, para poder realizar esta saída necesitades unha bicicleta e o casco (obrigatorio), así como un móbil coa APP Strava para seguir o percorrido. E claro, agora que chega o verán, unha gorra, crema protectora solar e algo para comer e beber.
A continuación, deixámosvos a ligazón co punto de saída, así como ao percorrido, para que poidades botarlle unha ollada ao mesmo.
Todas as persoas interesadas podedes reservar a praza na recepción dos nosos centros ata completar o grupo. É unha actividade gratuíta para os nosos socios/as (aínda que deberán ter o seguro anual para poder realizar actividades no exterior, que ten un prezo de 10 euros e unha vixencia dun ano). Os non abonados, ademais do seguro obrigatorio, terán que pagar 4 euros pola saída.