Nestas últimas semanas e meses é unha das palabras que máis se repiten xunto a Corona Virus ou COVID-19: Medo. Medo a expoñerse, a contaxiarte ou contaxiar aos que queres, a relacionarte coa túa xente, a recuperar a túa vida, a cambiar de vida… E é que todos, absolutamente todos, nalgún momento da nosa vida, sentimos medo.
Por iso, acudimos a unha especialista, á psicóloga Eva López, para que nos axude a afrontar o medo da mellor forma posible e ela ten claro que hai que saber “facerte amigo do teu medo, cumprir as normas establecidas, pero vivir plenamente”. Precisamente a situación que vivimos ensinounos o rápido que poden cambiar as cousas sen que ti fagas nada, polo que igual é máis importante que nunca que loites polo que queres, sen deixar que o medo che paralice.
Ao regresar do confinamento, Eva López atopouse na súa consulta máis divorcios e separacións que nunca, conflitos familiares, dúbidas sobre o traballo… “Nalgúns casos a ruptura é a mellor opción; noutros, non fai falta chegar tan lonxe, tan só é necesario cambiar a relación ou o traballo tal e como o entendiamos ata ese momento. Transformalo”.
O certo é que esta situación puxo de manifesto emocións antes invisibles, moitas veces incómodas, “coa esperanza de que lles deamos voz e as solucionemos. E iso dá medo, enfrontarnos ás nosas emocións a miúdo dá medo, e o medo paraliza. Paralízanos”.
E precisamente iso é o que debemos tratar de evitar, expresa a psicóloga viguesa. “Non hai nada peor que o medo. Fréate, faiche deixar de ser quen es e convértete nunha versión moi pobre de ti mesmo. Asegúroche que a mellor versión de ti mesmo non provén do medo, senón do amor. Gústame explicar a metáfora de que para min o medo é un cascabel e que detrás del está unha gran oportunidade, a dun gran don ou talento en nós, ata o de agora escondido”.
Tal e como nos conta, Eva López, o medo é unha forma de protexerse do descoñecido, “pero que, á vez, sen querelo, impídeche crecer e brillar”. Convidámosvos a ler as reflexións de Eva sobre o medo e como superalo facéndote o seu amigo.