Chega a sétima edición de Ciclauga, esa competición na que combinamos natación e bicicleta e na que o bo ambiente está asegurado. A cita será o próximo día 4 de maio en Máis que Auga Coia e para esta edición temos novidades, que vos iremos contando a continuación! O prazo de inscrición ábrese hoxe!
Como seguro que moitos xa sabedes, Ciclauga é unha competición na que as e os participantes terán que facer dúas probas, de 20 minutos cada unha, en bicicleta e piscina, por esta orde. O obxectivo é conseguir o maior número posible de puntos e estes dependerán dos quilómetros que realices na bicicleta de ciclo indoor (1 punto por cada quilómetro completado) e o número de voltas que sexas capaz de dar na piscina (1 punto por cada volta). Como en edicións anteriores, se o tempo nos acompaña, instalaremos as bicicletas no exterior do centro e se é necesario, acudiremos ás mangueiras para refrescar aos nosos/as participantes.
O ano pasado xa introducimos a modalidade de substitucións mixtas (equipos estarán formados por un participante masculino e un feminino) e nesta edición os equipos poderán ser mixtos, masculinos ou femininos. En substitucións, un dos integrantes do equipo realizará a proba de bici e o outro, a natación, sumando os resultados a un marcador común. A competición comezará ás 16:00 horas e contará con cinco quendas (tres individuais e dúas de substitucións). En total poderán participar un total de 36 persoas na proba individual e 24 equipos en substitucións (48 participantes).
Como todos os anos haberá premios para os tres primeiros clasificados, aínda que xa sabedes que para nós Ciclauga é un xogo, unha maneira diferente de facer deporte, de incentivarvos, pero o que de verdade nos gusta é ver como vos animades uns a outros, sen importar quen vaia por diante. E por iso, este ano como novidade tamén, ao finalizar a proba e a entrega de premios teremos uns petiscos para os e as participantes, para intercambiar opinións e alongar aínda máis nosa tarde de goce.
Como podedes inscribirvos? A inscrición permanecerá aberta desde hoxe ata completar o aforo dispoñible. Podes reservar a túa praza na recepción de calquera das nosas instalacións e se tes algunha dúbida, consulta cos nosos técnicos/as en sala ou piscina. Se es socio/a, a participación é gratuíta e no caso dos non abonados o prezo é de 4,30 euros. Queremos lembrarvos que non é necesario estar nun estado de forma incrible para participar. Como vos acabamos de contar, é unha proba que ten como obxectivo fundamental pasar un bo intre xuntos e considerámolo máis un xogo que unha competición.