Sabedes que sempre insistimos na importancia que ten o exercicio físico na saúde. Como responsables do coidado do voso corpo, e por tanto da vosa saúde, é algo que repetimos constantemente e que nos gusta avalar con estudos científicos.

Por iso hoxe traemos un estudo realizado por investigadores das universidades de Cambridge e Edimburgo, que resalta os beneficios que teñen os pequenos cambios no estilo de vida, como a práctica de exercicio, fronte ás consecuencias negativas para a saúde dos baixos niveis de actividade física. E as súas conclusións non poden ser máis contundentes: O exercicio físico evita, cada ano, polo menos 3,9 millóns de mortes prematuras en todo o mundo.

A Organización Mundial da Saúde (OMS) recomenda 150 minutos de actividade aeróbica de intensidade moderada á semana ou equivalentes (75 minutos de actividade forte ou unha combinación de ambas). Este equipo analizou sobre 168 países, a proporción da poboación que cumpre con esta recomendación da OMS, que variou de forma importante entre países: do 33% para Kuwait, ao 64% no Reino Unido e ao 94% para Mozambique.

Ao combinar estes datos con estimacións do risco relativo de falecer prematuramente nas persoas activas en comparación coas persoas que non realizan actividade física, os autores calcularon a proporción de mortes prematuras que se evitaron relacionadas coa actividade física. Así, descubriron que a nivel mundial, debido á actividade física, o número de mortes prematuras foi un 15% de media menor (14% para as mulleres e 16% para os homes), o que equivale a aproximadamente 3,9 millóns de vidas salvadas por ano.

Os autores afirman que este estudo é o primeiro en cuantificar o efecto da actividade física sobre a saúde e confían en que sirva para concienciar aos dirixentes sobre a importancia de facer deporte.

Nesta ligazón podedes ler o artigo de ABC sobre este estudo.