Se para o sábado temos un roteiro en bicicleta de montaña, o domingo 19 de decembro temos unha dobre actividade de trail e sendeirismo no Monte Galiñeiro.
Comezaremos co trail running ás 9:00 horas, con saída desde o parque forestal de Zamáns, cun percorrido esixente pero tremendamente satisfactorio e reconfortante. Como xa sabemos, as costas forman parte do encanto de Vigo e neste trail haberá unha subida interesante ata o vértice xeodésico do Galiñeiro, o pico máis alto da provincia de Pontevedra, que está situado a 709 metros sobre o nivel do mar e desde o que gozaremos de magníficas vistas. Serán uns 4 quilómetros de subida ata alcanzar a cima e despois tocarannos outros catro quilómetros de baixada, onde poderemos gozar dos bosques e os carreiros de Zamáns ata alcanzar o parque forestal. En total, uns 8 quilómetros, 380 metros de desnivel e unha duración aproximada de 90 minutos.
Nas ligazóns tedes o punto de saída e o percorrido do trail.
A partir das 10:30 comezará o roteiro de sendeirismo, con saída desde o merendeiro de Zamáns e cun percorrido parecido ao do trail pero un pouco menos esixente. Chegaremos ata o vértice xeodésico do Galiñeiro, para despois descender ata o miradoiro de Castro Herville, onde poderemos gozar dunha panorámica espectacular de toda a zona de Porriño. A continuación, volta ao merendeiro onde esperamos chegar ao redor das 14:00 horas. O percorrido total ten unha lonxitude de 10.500 metros e 400 metros de desnivel.
Imprescindibles para o roteiro? Un calzado cómodo e adecuado ao terreo, roupa de abrigo, chubasqueiro (se chove), moitas ganas de pasalo ben e de gozar da marcha, da contorna e da compañía. Ahhh, a comida e bebida son opcionais, pero recomendables para non desfalecer!
Se estades interesados, podedes reservar a praza na recepción dos nosos centros ata completar aforo. É unha actividade gratuíta para os nosos socios/as (aínda que deberán contar co seguro anual para poder realizar actividades no exterior, que ten un prezo de 10 euros e unha vixencia dun ano). No caso dos non abonados, ademais do seguro obrigatorio, deberán pagar 4 euros pola saída.