Botabámola moito de menos e Mucha a nós, así que queremos celebrar o seu regreso! Durante o confinamento, falámosvos da nosa clase de Mantemento Sénior das 09:15 de Navia. Era un grupo moi especial, dirixido pola nosa técnica Jana Nogueira, que seguiu unido a pesar da distancia. Así, pasaron o primeiro confinamento xuntos a través do grupo de whasapp, falando e facendo deporte desde clase con Casagym. Despois, algúns se reincorporaron, pero Mucha, aínda que probou, non sentía cómoda, polo que decidiu esperar e a espera alongouse moito máis do que ela e nós desexabamos. Chegaron as vacinas, melloraron os datos de incidencia da COVID-19, levantouse o estado de emerxencia sanitaria e, por fin, esta semana Mucha regresou ás clases de Jana. “Volvín este martes e o primeiro día custoume, estaba un pouco desubicada. Non me atopaba cómoda, pero o mércores xa me sentín moito mellor. Ademais, aí está a miña Jana e eu con ela, non necesito máis”, explica Mucha que volveu a Máis que Auga xunto ao seu marido Ricardo.
Da súa clase orixinal faltan varios compañeiros, aínda que a algún si que puido velo esta semana, “algún está, pero coa máscara ata me custa atopalos”, chancea a nosa querida socia, que en todo este tempo, a pesar de non vir, non quixo darse de baixa.
Mucha non trata de disimular o seu agarimo por Jana, “é única, ese sentido do humor que sempre che saca un sorriso, é marabillosa e por iso estou aquí”. Ademais, a nosa Mucha recoñece que a actividade física é moi necesaria para ela, porque “eu son costureira e pásome moitas horas sentada, así que necesito moverme, porque teño unha vida moi sedentaria”. E o que máis vos vai a sorprender é a idade de Mucha que ten… 76 anos camiño dos 77! Chancea cando lle preguntamos como segue traballando: “É que a xefa Mucha non me deixa”.
Vitalidade ten para dar e repartir, iso está claro. A pesar de todo este tempo sen facer nada -“no primeiro confinamento si que fixemos ximnasia desde casa, pero despois deixeino”-, afirmou que non lle custou nada volver ás clases e con máscara: “Puiden seguilas sen problema”, e iso que, segundo nos explicou Jana, “son unhas clases de mantemento sénior pro, porque fan de todo, non se queixan nada e é a mellor clase que hai en Máis que Auga”. Ademais, agora que xa se está volvendo á normalidade, Jana puido recuperar os xogos, os desprazamentos, os circuítos… e están encantados! Ata vén xente de 30, 40 e 50 anos”. Na clase do mércores eran 32 persoas participando na clase e divertíndose ao máximo.
Cando lle preguntamos a Mucha cales son os seus plans na súa volta ao Máis que Auga afirma sen dubidar: “Vou ir luns, martes e mércores, porque é cando teño a clase con Jana e é o que quero facer”. O grupo de whasapp da clase continúa vivo e Jana segue preocupándose polos seus “ xovenzuelos”, algúns xa de volta na instalación e outros con ganas de regresar. A todos eles, dicirlles que estamos a desexar volver velos!