HBX Boxing é unha desas actividades de Máis que Auga Barreiro que non pasan desapercibidas. Se pasas polo box, atráeche, porque sen dúbida as e os participantes transmiten a súa enerxía e o seu goce. Así que nos coamos na clase de HBX Boxing para coñecela por dentro e poder contalo.
Comezamos por falar co técnico Pablo Barciela, para que nos explique en que consiste a actividade: “É un adestramento integral de todo o corpo e unha actividade perfecta para descargar o estrés do día. É chegar, poñer as luvas, soar a música, e comezar a gozar e liberar tensión”, afirma, e a verdade é que iso é o que apreciamos ao velos golpear o saco.
E que ninguén pense que é unha clase só para persoas cunha gran condición física, porque non é así. Hai unha enorme variedade nas idades, desde xente moi nova a persoas de entre 40 e 50 anos e con participantes de ambos os xéneros. E cales son os beneficios de HBX Boxing? Moitos, así que imos enumerar algúns: Mellora do sistema cardiovascular, da coordinación e o equilibrio, perda de peso, aumenta a forza muscular, liberación de estrés, mellora a calidade do soño… Que esperas para probalo? Esta actividade está incluída no teu abono e tes unha gran variedade de días e horarios (luns ás 10:30 e 20:15; martes ás 20:15; mércores, 19:15; e xoves, ás 20:45 horas).
E despois de falar con Pablo, quixemos coñecer as opinións dalgunhas das nosas usuarias. Sandra, de 42 anos, explicounos que era unha das súas actividades favoritas e resumíao en dúas frases: “Unha das cousas que me gusta é que utilizas todos os músculos do teu corpo e, sobre todo, que se libera moito estrés”, afirmou. Ela comezou no ximnasio despois do primeiro confinamento, “moito tempo encerrada” e agora goza ao máximo de Máis que Auga, xa que ademais de HBX tamén vai ás clases de gluteboom, pyro, invicto e power, ademais de pasarse pola sala cando pode.
Alba tamén goza ao máximo de HBX, na súa clase dos mércores (19:15 horas): “É unha clase que conleva un esforzo físico grande e ao finalizala síntome liberada, desafógome”. Alba, de 28 anos, ía a unha clase similar fóra de Máis que Auga, aínda que tamén era socia da nosa instalación. Así que cando chegou HBX a Barreiro, probouna e xa quedou.
E finalizamos a nosa mini enquisa con Loli, quen vai catro veces á semana a HBX, e “porque non me dá tempo a máis”, chancea. Da actividade destaca que “é bastante rápida, fas moito cardio, traballas a forza, a coreografía é moi fácil e é unha actividade esixente, notas que fas exercicio e desestresas unha chea, ao pegarlle ao saco. Ademais, é moi divertida, entretida”. Loli, de 53 anos, é fiel a HBX porque desde que chegou a Barreiro en 2019, non a perde, aínda que tamén fai wodfit, bike e traballo de pesas en sala.