Esta semana, o 4 de marzo, celebrouse o Día Mundial contra a Obesidade, que ten o obxectivo de concienciar ás persoas sobre o terrible dano que conleva para o organismo unha dieta alta en graxa e azucres. A Organización Mundial da Saúde (OMS), promotora desta conmemoración, lembra que a obesidade alcanzou proporcións epidémicas a nivel mundial. Estímase que, desde 1967, esta enfermidade triplicouse, logrando que en 2016, 1900 millóns de adultos a padecesen así como 340 millóns de nenos e adolescentes.
E en España? Segundo datos do Ministerio de Sanidade, na poboación adulta española (25-60 anos) a prevalencia de obesidade é do 14,5% mentres que o sobrepeso ascende ao 38,5%. Isto é, un de cada dous adultos presenta un peso superior ao recomendable. A obesidade é máis frecuente en mulleres que en homes. Ademais, viuse acrecentada neste último ano de pandemia mundial, no que aumentou de forma clara o sedentarismo e tamén a obesidade.
Así, queremos lembrarvos algúns consellos para loitar contra a obesidade, un problema a nivel mundial que preocupa e moito, xa que á súa vez provoca outras enfermidades que poden chegar a ser moi graves. Durante a pandemia da COVID-19, a obesidade tamén tivo, desgraciadamente un papel protagonista. Os estudos realizados demostraron que a obesidade é un dos principais factores de risco para cursar cunha infección grave e falecer por Covid-19.
Son moitas as razóns polas que dar un paso adiante para loitar contra o sobrepeso. Desde aquí, queremos darvos unhas liñas de actuación moi sinxelas, pero nas que é necesario o voso compromiso. Non falamos de dietas milagrosas, nin de propósitos do novo ano, nin da operación bikini… Falamos de cambiar pautas de vida, con dous parámetros fundamentais.
- Unha alimentación sa. É primordial e sinxelo de levar a cabo agora que estamos moito máis tempo en casa. Por que non nos poñemos o mandil e probamos a realizar unha desas receitas da avoa, ou algunha desas que sempre quixeches facer e non te atrevías? É o momento de acudir aos mercados, ao comercio do barrio para pedir os alimentos de tempada, que sempre serán os mellores. A quen non lle apetece agora unhas ricas e doces fresas? Pode ser a mellor das sobremesas e a máis san tamén. É fundamental que lembredes que non estamos a falar de dieta, senón dun cambio de hábitos alimentarios, algo a aplicar os 365 días do ano, seguindo unhas pautas moi sinxelas: Incrementar o consumo de froitas, vexetais, cereais e legumes; beber máis auga e bebidas saudables; tentar consumir menos graxas saudables e evita ao máximo o consumo de alimentos ultraprocesados, azucres e graxas trans.
- Actividade física. Para loitar contra a obesidade é importante tamén facer exercicio. Unha vez máis non estamos a falar de modas, senón dun cambio na túa vida. Nesta época de pandemia aumentou o sedentarismo, así que chegou o momento de dar un paso adiante. Non se trata de machucarse, senón de incorporar a actividade física aos teus hábitos diarios, e verás como, aos poucos, iso vese reflectido na túa vida: Durmirás mellor, diminuirá a tensión e aumentará o benestar físico e psicolóxico. Porque o exercicio físico mellora o noso estado de ánimo e reforza a autoestima.