Como optimizar o adestramento na casa? É unha pregunta que nos chegaba dos nosos usuarios, polo que nos decidimos a realizar unha charla por videoconferencia para resolver dúbidas e dar unha serie de claves para seguir adestrando en casa e manténdonos en forma a pesar do confinamento e, en ocasións, os poucos metros de vivenda dispoñibles.

Así, na webinar contamos coas achegas dos técnicos Marcos Alonso, Andrés Viana, Eduardo Davila e Jesús Cabezas, que comezaron a súa charla recoñecendo “as ganas que teñen de vestir a camiseta verde”. Onte lucírona con orgullo alén da cámara, pero iso si, desde casa, cumprindo coas indicacións de alarma sanitaria que estamos a vivir polo COVID-19.

En xeral todos eles estaban a facer deporte en casa, aínda que algúns menos do que desexarían, “xa que cos nenos, ao final tes menos tempo do que pensabas”. Edu é o que máis tempo está a dedicar ao adestramento, “xa que non teño nenos”.

A continuación tedes algúns dos puntos destacados da charla, pero queremos comezar polo principal: “Hai que moverse”.

Como estruturar os adestramentos na semana. Primeira clave, todo depende da persoa. Temos que partir do momento previo a este parón, xa que non se pode pasar de adestrar dous días a sete. A idea fundamental é tratar de facer a mesma cantidade de traballo que antes ou un pouquiño máis, xa que agora te pasas as 24 horas do día na casa. Tamén é importante establecer períodos de descanso, xa que o descanso activo forma parte do adestramento. Outra das claves é combinar os niveis de intensidade (alta e baixa), algo que incluso se pode realizar no mesmo día.

Quecemento. É importante facer quecemento e sempre adecuado á actividade que vaias realizar a continuación. Mesmo, esta parte da sesión permíteche introducir pequenas pinceladas para traballar aspectos que despois non tratarás na actividade posterior. Por exemplo, se despois non vas traballar o core, podemos meter dous exercicios de activación de core no quecemento, ou aproveitar para traballar eslabóns débiles (musculatura débil ou que require dunha activación como pode ser o glúteo ou musculatura estabilizadora).

Como non perder masa muscular. O obxectivo neste caso é tratar de non perder, sobre todo porque en casa faltan materiais, cargas pesadas, axudas de compañeiros… Por iso, o adestramento durante o tempo de confinamento é unha oportunidade para traballar aspectos que ás veces se nos escapan (core, mobilidade, funcional, traballo explosivo…). Facer dúas sesións ao día, pero non demasiado longas; traballo con menos peso pero xogar con micropausas, e teremos que agudizar o enxeño: Garrafas de auga, usar cadeiras ou mesas para facer remo… Hai titoriais incribles como sobre fabricar material, pero con sentido común!

Perda de peso e graxa. O traballo funcional é básico. É mellor realizar sesións de traballo que non sexan demasiado longas, pero con maior intensidade, para así perder graxa; combinar adestramento de forza e de cardio e lembrar que a alimentación para este obxectivo é fundamental.

Traballar con nenos. É moi positivo traballar con nenos/as e sobre todo incidir no aspecto lúdico, Estamos 24 horas encerrados en casa, polo que non é bo converter o adestramento nunha rutina máis, ten que ser un entretemento, tanto para os pequenos como para os maiores.

Nesta ligazón poderedes ver a charla ao completo.