Máis que Auga segue sumando premios e recoñecementos aos seus deportistas. Se a pasada semana era o membro da sección de kickboxing que se prepara en Barreiro, Adrián Cruz, quen obtiña o título de campión de España na categoría de kicklight en Sevilla, esta semana chega o recoñecemento da Secretaría Xeral para o Deporte da Xunta a dúas deportistas de élite da familia Máis que Auga: Susana Rodríguez Gacio y María Bautista.

O xoves 12 de maio, en Ourense, celébrase a gala anual do deporte en Galicia. Nela, a paratriatleta Susana Rodríguez recibirá o premio á mellor deportista galega do ano 2015 na modalidade de deportista feminina con discapacidade. Un galardón que lle chega semanas despois de lograr o pasaporte para os Xogos Paralímpicos de Río 2016.

Pola súa parte, María Bautista, mestre de taekwondo en Máis que Auga e árbitro internacional deste deporte, consegue, por segundo ano, ser recoñecida como a mellor xuíz-árbitro de Galicia en todas as modalidades deportivas. Un premio dun enorme valor para ela e para todo o colectivo arbitral.

Parabéns a ambas