O grupo de rapaces participantes no Campus de Máis que Auga tiveron un emocionante contacto co deporte paralímpico, no acto de despedida dos deportistas Susana R. Gacio e Chano Rodríguez organizado nas instalacións de Navia.

A experiencia resultou moi participativa e dinámica: os rapaces de entre 8 e 12 anos, aos que se sumaron algúns membros do equipo Club de Mar que adestran con Susana, participaron primeiro nunha carreira de natación por relevos contra os deportistas. Tras a carreira colectiva houbo tempo para unha conversa na que os rapaces interesáronse sobre aspectos do adestramento ou a vida dun superatleta: para Susana “erguerse pola mañán, sobre todo no inverno é o máis duro”. Chano explicoulle aos rapaces que para el “facer deporte é como estudiar: un esforzo necesario para poder avanzar”.

O acto concluíu coa entrega duns ramos de flores e senllas placas conmemorativas, entre berros de apoio dos rapaces aos nosos deportistas paralímpicos que sairán o vindeiro día 3 para competir nos Xogos Paralímpicos de Río.